Ýylgyn çybygyndan bedew edinip,
Aýakýalaň däli tüweleý kowlan —
Ýyllarymy ýyly goýnuňda gizläp,
Ýatyrsyň gumlary ýassanyp, obam.

Aňyrsynda aňňat-aňňat alaňlaň,
Älemiň gelşigi dolan Aý dogýar.
Aý-aýdyň, süýt ýaly tomus gijesi,
Daýzalar hiňlenip düýesin sagýar.

Sekä ýazlan goşma keçäň üstünde,
Goňşular gyzykly gürrüňe gümra.
Obaň golaýynda gawun sakçysy,
Otyr garantgany edinip hemra.

Ýuwaş süýşüp, bulutlara duwlanyp,
Aý göýä wadaly jaýyna barýar.
Aýak ýygnansa-da, iller ýatsa-da,
Uka sak, eserdeň köpekler üýrýär.

Örüsi daşlaşyp, çöken düýäniň,
Garaşýan köşegi zaryn bozlaýar.
Şöwür çekip daş guýynyň başynda,
Aşyk ýigit magşugyny yzlaýar.

Arkan düşüp ak çägäniň üstünde,
Patrak ýaly ýyldyzlary synladym.
Atyp gelýän täze daňy buşlaýan,
Horazlaň nazymly sesin diňledim.

Daň dökýär ak süýdün gijäň etegne,
Misli oba serpýär gara ýorganyn.
Säher diňläp aýdymyndan doýmadym,
Sähradaky saýrak dostum torgaýyň.

Dörtguly Tagandurdyýew,
Etrek etrabyndaky 3-nji orta mekdebiň mugallymy.
"Balkan" welaýat gazeti, 18.04.2024