Kitap okamak bagty
Durmuşyň gadyryny bilýän adam üçin bu dünýä gelmek bagtyýarlykdan nyşandyr. Dünýä geleňsoň döretmek we gurmak miýesser edenligi ykbalyň saňa beren peşgeşidir. Onuň üçin okamak, öwrenmek mümkinçiliginiň berlenligi bolsa işleriň şowlaýandygyny we oňuna bolýandygyny aňladýar. Sallançakdan bütin ömrüň dowamynda okamagyň, öwrenmegiň sargyt edilmegi ynsanyň kämil ýaşamagy hakyndaky pelsepeden ugur alýar.
Doglan gününiň 300 ýyllygyny bellemek üçin taýýarlyk görülýän beýik akyldarymyz Magtymguly Pyragynyň dürdäne döredijiligine salgylansaň, okamagyň ähli üstünlikleriň açarydygy hakyndaky ganatly jümläniň many giňişligine düşýärsiň. Magtymguly atamyz: «Kitap okan gullar magnydan dokdur...» diýeninde okamagyň ynsany kämilleşdirýändigini nygtasa, Gündogaryň ýene bir akyldary Abdyrahman Jamy kitabyň iň ýakyn dostdugyny nygtap şeýle diýýär:
Kitapdyr ynsanyň baky hemrasy,
Oňarsaň bolgun sen onuň gümrasy.
Kitap dostdur, asla gama batyrmaz,
Pähmiňi goýaldar, pikirleň şasy.
Akyldarlaryň biriniň: «Gowy kitaby ilkinji gezek okanymyzda, biz täze dost tutunan ýaly bolýarys. Öň okan kitabymyzy gaýtadan okanymyzda bolsa, köne dostumyza sataşan ýaly bolýarys» diýen setirlerinde-de kitap okamagyň ömrümize many gatýandygy aýdylýar. Çünki ynsan öz öňünde goýan maksadyna sary alyp barýan menzillerde dowamly zähmet çekýär, okaýar, öwrenýär. Şol tagallalar bolsa öz miwesini berýär. Türkmen halkynyň «Yhlasa — myrat» diýip, iki sözde aňymyza jäheklän jümlesiniň mysalynda irginsiz okap, öwrenen ynsanlaryň maksadyna ýetýändigi dogrusyndaky pelsepe bilen ýüzbe-ýüz bolýarys.
Gahryman Arkadagymyzyň çykyşlaryny diňläniňde, pähim-paýhasa ýugrulan kitaplaryny okanyňda, ähli şowlulyklaryň gözbaşynda okamak durandygyny görmek bolýar. Türkmen halkynyň Milli Lideriniň taýsyz tagallasy bilen çapa taýýarlanylyp, okyjylara hödürlenilen «Paýhas çeşmesi» atly ajaýyp kitapda okamagyň ähmiýeti hakynda onlarça nakyllar ýerleşdirilipdir:
Kitap okamaýan görýänini görer, kitap okaýan dünýäni görer;
Bilmeýän zadyňy kitapdan sora;
Kitap okamaýan bir dil biler, kitap okaýan kän dil biler;
Kitaby magşuk saý, özüňi — aşyk;
Kitap eneň-ataň ýaly terbiýeçidir;
Kitaby har saklamak günädir;
Kitapsyz okalmaz, merdiwansyz çykylmaz;
Işiň ussasy — okamak;
Okamak — iňňe bilen guýy gazmak.
«Paýhas çeşmesindäki» dürdäne pikirler okamagyň bagtdygyny, öwrenmegiň derejedigini, kämilleşmegiň şertdigini ýatladýar. Şonuň üçin «Kitap okamak bagty» diýen jümläniň aňyrsynda jemgyýetiň talap edýän esasy ýörelgesiniň ýatandygyny ýaşlara ýatlatmak isledim. Sebäbi biz ýaş nesle bilim we terbiýe beren wagtymyz olaryň kämil bolmagy hakyndaky durnukly ýörelgeden ugur alýarys. Ylymly-bilimli ýaşlar bolsa okan kitaplaryndan kämilleşmegi, diýmek, Watany söýmegi, döwrebap nesil bolmagy, zamana mynasyp ýaşamagy kalplaryna siňdirýärler. Okamak arkaly maksadyna ýetmek üçin tagalla edýän ýaşlarymyza üstünlik we rowaçlyk arzuw edýäris! Hormatly Prezidentimiziň: «Watan diňe halky bilen Watandyr» diýen parasatly ýörelgesiniň many çuňlugyna aralaşsaň, onuň her bir adamyň Watanyny beýgeltmek üçin kämil bolmalydygyna, ýagny okamalydygyna göz ýetirýärsiň.
Gülnar GELDIÝEWA,
Aşgabat şäherindäki ýöriteleşdirilen
42-nji orta mekdebiň mugallymy.
"Türkmenistan Sport" Halkara žurnalynyň elektron goşundysy, 13.11.2023